澳門好多街道名都十分有趣，而且同居民嘅生活、文化，以及社會發展息息相關。小編仲搵到12生肖暗藏於此，新春佳節，大家都不妨去行個大運啦！
今年係狗年，喺澳門亦有一條街道同狗有關，就係“劏狗環巷 Travessa da Praia”。此處位於黑沙環區，以前稱“劏狗環”，亦即係而家嘅“海邊馬路”。而葡文Praia嘅解釋係“海灘”嘅意思。
牛房，位於澳門美副將大馬路與罅些喇提督大馬路交界。係過去牛隻由內地運抵澳門，屠宰前之中轉站。老一輩澳門人心中，呢個曾“放置牛牛的倉庫”，一直被稱“牛房”。此處為市政牧場舊址，葡文名稱：Antigo Estábulo Municipal de Gado Bovino。
兔巷 Travessa da Lebre，位於東望洋新街，有無人知道喺邊度？睇個街名就知，呢條街係好細，唔容易比人發現。（你有無見到好大隻兔仔周街跳？）而提到東望洋新街，大家不妨使用愕街自動扶梯系統，輕輕鬆鬆上斜路。
講完“兔巷”，小編十分推薦你行埋“山雞巷 Travessa do Faisão”，點解？兩者好接近，正確位置：“東望洋斜巷2K與4號之間起，至兔巷止”，而葡文Faisão就係雉雞嘅意思。
聚龍舊社 Beco Central／聚龍社，又名玫瑰裡（聚龍通津、騎樓街），葡文名稱：Beco da Rosa（Rosa意為玫瑰）。此處與關前正街相接，明清之時原係臨海之地，另一名稱“通津”即有通往河濱埠頭嘅巷弄之意。巷內建有一個社公祠，名為“聚龍社”，其內儲存嘅《聚龍社碑誌》係清嘉慶年間官府與居民合訂嘅“坊約”。
行完“龍”，大家不妨去埋附近，位於沙梨頭嘅“蟒裡”，葡文名稱：Beco do Dragão，小編心中OS：明明葡文Dragão係“龍”嘅意思，點解又會變咗蛇呢？
牡羊巷 TRAVESSA DO PASTOR，位處美副將大馬路、俾利喇街交界，附近有望廈康真君廟、觀音堂兩大古剎，歷史氣息極濃，皆因呢條街就位處昔日鼎鼎大名嘅望廈村內。穿過牧羊巷，中間有一條捷徑可以直達慕拉士大馬路，瞬間到北區。識得行一定係咁行！
亞馬喇前地 PRAÇA DE FERREIRA DO AMARAL，咁大個公共巴士站係呢度，應該無乜幾個澳門人唔知係邊。原來，呢度係澳門第一個，亦係最大嘅一個公共巴士轉乘區。點大法？有成42條巴士線路會經過呢個站哦！
老虎巷 TRAVESSA LOU FU，位於氹仔舊城區。小編心中OS又嚟啦，唔通呢度以前曾出現過老虎？
值得留意嘅係，澳門好多用動物命名嘅街道，中文與葡文名稱係對應的，而呢度嘅葡文名，就無用 TIGRE，而係用廣東話譯音 LOU FU。不過民署就話，命名街道時，會按照情況選擇意譯或者音譯，至於音譯呢，就廣東話或普通話都會用。仲有仲有，呢度離官也街呢個美食集中地好近，唔講咁多，食咗先講！
豬裡／史山豬圍 BECO DO PORCO，位處大炮臺山腳，利馬竇學校附近。呢度就住宅林立，唔係打卡首選，不過講到附近嘅”柿山哪吒廟”（唔係位於大三巴後面嘅哪吒廟哦），就好值得參觀喇！點解？因為呢間廟唔止係澳門137項被評定嘅文物之一，而且同我地認知嘅廟有少少唔同，因為佢只係一座四方亭。咁嘅廟你又見過未？
二龍喉街 RUA DA FONTE DA INVEJA，位處松山隧道出口處、治安警交通廳附近。（哈哈～喉與猴同音，估唔到呢！其實澳門並無以”猴”字命名嘅街道名哦！）呢條街嘅葡文名，原來係“嫉妒泉”嘅意思（又再一次估唔到！），係昔日二龍喉街頭一口泉眼嘅名，而家已經枯竭。覺得俾小編呃咗嘅大家，可以去附近嘅二龍喉公園行下，因為裡面真係有馬騮睇哦！
登登登登！ 嚟到壓軸出場嘅最後一個生肖，鼠！究竟民政總署，同老鼠有咩關聯？其實係… “鼠” 同 “署” 嘅普通話讀音一樣 (shǔ)。哈哈~係咪又估唔到呢，其實澳門亦是無以”鼠”字命名嘅街道名哦。其實，民署喺民政總署大樓以及附近嘅議事亭前地，都佈置咗賀歲燈飾，好值得大家嚟睇一睇！
本文章將原文轉貼為繁體中文方便閱讀