澳门好多街道名都十分有趣，而且同居民嘅生活、文化，以及社会发展息息相关。小编仲揾到12生肖暗藏于此，新春佳节，大家都不妨去行个大运啦！
今年系狗年，喺澳门亦有一条街道同狗有关，就系“㓥狗环巷 Travessa da Praia”。此处位于黑沙环区，以前称“㓥狗环”，亦即系而家嘅“海边马路”。而葡文Praia嘅解释系“海滩”嘅意思。
牛房，位于澳门美副将大马路与罅些喇提督大马路交界。系过去牛只由内地运抵澳门，屠宰前之中转站。老一辈澳门人心中，呢个曾“放置牛牛的仓库”，一直被称“牛房”。此处为市政牧场旧址，葡文名称：Antigo Estábulo Municipal de Gado Bovino。
兔巷 Travessa da Lebre，位于东望洋新街，有无人知道喺边度？睇个街名就知，呢条街系好细，唔容易比人发现。（你有无见到好大只兔仔周街跳？）而提到东望洋新街，大家不妨使用愕街自动扶梯系统，轻轻松松上斜路。
讲完“兔巷”，小编十分推荐你行埋“山鸡巷 Travessa do Faisão”，点解？两者好接近，正确位置：“东望洋斜巷2K与4号之间起，至兔巷止”，而葡文Faisão就系雉鸡嘅意思。
聚龙旧社 Beco Central／聚龙社，又名玫瑰里（聚龙通津、骑楼街），葡文名称：Beco da Rosa（Rosa意为玫瑰）。此处与关前正街相接，明清之时原系临海之地，另一名称“通津”即有通往河滨埠头嘅巷弄之意。巷内建有一个社公祠，名为“聚龙社”，其内储存嘅《聚龙社碑志》系清嘉庆年间官府与居民合订嘅“坊约”。
行完“龙”，大家不妨去埋附近，位于沙梨头嘅“蟒里”，葡文名称：Beco do Dragão，小编心中OS：明明葡文Dragão系“龙”嘅意思，点解又会变咗蛇呢？
牡羊巷 TRAVESSA DO PASTOR，位处美副将大马路、俾利喇街交界，附近有望厦康真君庙、观音堂两大古刹，历史气息极浓，皆因呢条街就位处昔日鼎鼎大名嘅望厦村内。穿过牧羊巷，中间有一条捷径可以直达慕拉士大马路，瞬间到北区。识得行一定系咁行！
亚马喇前地 PRAÇA DE FERREIRA DO AMARAL，咁大个公共巴士站系呢度，应该无乜几个澳门人唔知系边。原来，呢度系澳门第一个，亦系最大嘅一个公共巴士转乘区。点大法？有成42条巴士线路会经过呢个站哦！
老虎巷 TRAVESSA LOU FU，位于氹仔旧城区。小编心中OS又嚟啦，唔通呢度以前曾出现过老虎？
值得留意嘅系，澳门好多用动物命名嘅街道，中文与葡文名称系对应的，而呢度嘅葡文名，就无用 TIGRE，而系用广东话译音 LOU FU。不过民署就话，命名街道时，会按照情况选择意译或者音译，至于音译呢，就广东话或普通话都会用。仲有仲有，呢度离官也街呢个美食集中地好近，唔讲咁多，食咗先讲！
猪里／史山猪围 BECO DO PORCO，位处大炮台山脚，利马窦学校附近。呢度就住宅林立，唔系打卡首选，不过讲到附近嘅”柿山哪吒庙”（唔系位于大三巴后面嘅哪吒庙哦），就好值得参观喇！点解？因为呢间庙唔止系澳门137项被评定嘅文物之一，而且同我地认知嘅庙有少少唔同，因为佢只系一座四方亭。咁嘅庙你又见过未？
二龙喉街 RUA DA FONTE DA INVEJA，位处松山隧道出口处、治安警交通厅附近。（哈哈～喉与猴同音，估唔到呢！其实澳门并无以”猴”字命名嘅街道名哦！）呢条街嘅葡文名，原来系“嫉妒泉”嘅意思（又再一次估唔到！），系昔日二龙喉街头一口泉眼嘅名，而家已经枯竭。觉得俾小编呃咗嘅大家，可以去附近嘅二龙喉公园行下，因为里面真系有马骝睇哦！
登登登登！ 嚟到压轴出场嘅最后一个生肖，鼠！究竟民政总署，同老鼠有咩关联？其实系… “鼠” 同 “署” 嘅普通话读音一样 (shǔ)。哈哈~系咪又估唔到呢，其实澳门亦是无以”鼠”字命名嘅街道名哦。其实，民署喺民政总署大楼以及附近嘅议事亭前地，都布置咗贺岁灯饰，好值得大家嚟睇一睇！
本文章将原文转贴为繁体中文方便阅读